Zëvendësdrejtori i Entit Shtetërorë për Statistika, Ilmi Selami sot bëri apel që qytetarët të mirëpresin regjistruesit dhe të mos dëgjojnë zërat që bëjnë thirrje për bojkot të procesit të regjistrimit.
“Më e mira është të hapni derën. Të pranoni regjistruesit, madje në mënyrë festive. Të regjistroheni duke deklaruar të dhënat që iu kërkohen sepse ky është një proces që shkon në interes të të gjithëve. Do iu kisha bërë apel të mos dëgjoni, të mos i vëni re, të mos i regjistroni aspak apelet e disa subjekteve politike minore, të disa personave, të disa grupeve të interesit të cilët nuk e dinë se në cilin mulli po e çojnë ujin, do iu kisha bërë apel të mos i dëgjoni thirrjet e tyre për bojkot”, tha mes tjerash Selami.
Ndryshe, procesi i regjistrimit do të zgjasë deri më 30 shtator, deri kur do të mund të regjistrohet online edhe diaspora. Në diasporë deri më tani ka rreth 191.000 persona të regjistruar. Regjistrimi i fundit i popullsisë është bërë pothuajse 20 vjet më parë, ndërsa në vitin 2011 i njëjti dështoi që në nisje.
Qytetarët që jetojnë jashtë vendit, e që nuk kanë mundësi të regjistrohen përmes aplikacionit online, nga sot do të mund të regjistrohen nga familjarët ose të afërmit e tyre në Maqedoninë e Veriut, që i dinë të dhënat për personin në fjalë./Alsat/
Ilmi Selami: Mos dëgjoni thirrjet për bojkot të regjistrimit shkruan Telegrafi.