Qeveria e Maqedonisë së Veriut ka pranuar sot dy propozimi të Ministrisë së Ekonomisë, përmes të cilave synohet tu dilet në ndihmë kompanive sa i përket furnizimit me energji elektrike në këtë kohë të krizës energjetike.
“Morëm vendim që tu dalim në ndihmë kompanive që janë në tregun e lirë, sa i përket furnizimit me energji elektrike dhe definuam marzhën të cilën ata mund ta implementojnë në momentin që bëjnë kontrata për furnizim me energji elektrike e cila nuk mund të jetë më shumë se 10 përqind, duke u referuar në çmimin e bursës HUPX (Hupex) e cila është bursë referente për Republikën e Maqedonisë së Veriut sa i përket energjisë elektrike”, deklaroi Kreshnik Bekteshi, ministër i Ekonomisë, shkruan Alsat.
Bekteshi gjithashtu njoftoi se është dërguar propozim deri tek Komisioni Rregullator për Energjetikë që të zvogëlohet marzha e furnizuesit me energji elektrike nga 50 në 20 përqind.
“Si propozim ndaj KRRE-së kemi dërguar që të zvogëlohet marzha e furnizuesit nga 50 në 20 përqind. Për fat të keq një numër i konsiderueshëm i institucioneve publike pavarësisht nëse janë në kuadër të pushtetit lokal apo qendror, ende edhe pse jemi në muajin shtator nuk kanë lidhur marrëveshje për tu furnizuar me energji elektrike që në mënyrë automatike e rëndojnë buxhetin e të njëjtave institucione dhe në vend që ai buxhet të shfrytëzohet për përmirësimin e kualitetit të arsimit, për projekte infrastrukturore në kuadër të komunave dhe pushtetit qendror ai buxhet paguhet në mënyrë të papërgjegjshme nga drejtuesit e këtyre institucioneve për furnizim me energji elektrike”, tha Bekteshi.
Kujtojmë se aktualisht vendi ka shpallur gjendjen e krizës energjetike dhe si një ndër masat për kursim është dhe kursimi i energjisë elektrike nga institucionet shtetërore, duke fikur dritat dekoratike të objekteve në mbrëmje si dhe duke reduktuar disa punë zyrtare brenda objekteve.
Qeveria e Maqedonisë ka miratuar dy propozime për t’i ndihmuar kompanitë në kohën e krizës energjetike shkruan Telegrafi.