Ministrja e Ekonomisë Delina Ibrahimaj ka reaguar pas disa lajmeve të publikuara këtë të premte, ku theksohet se bashkëshorti i saj ka qenë i përfshirë në një konflikt me drejtorin e Përgjithshëm të Agjencisë së Trajtimit të Kredive Eri Koshaj, duke e plagosur me thikë këtë të fundit.
Në një reagim, Ibrahimaj pranon se konflikti ka ndodhur rreth 5 muaj më parë, por mohon që ky incident të jetë shënuar në zyrat e shtetit.
Ministrja e Ekonomisë, më tej thekson se çështja është hetuar nga organet e drejtësisë dhe po nga këto të fundit, është mbyllur për shkak të mungesës së provave.
“Jam e keqardhur që 5 muaj pas një konflikti të padëshiruar, i cili ka kaluar në rrugën e drejtësisë dhe ka marrë përgjigje po në atë rrugë, sot më duhet të jap shpjegimin tim. Nuk kam asnjë arsye të fajësoj askënd lidhur me publikimin e këtij fakti, por kam detyrimin të sqaroj elemente që e bëjnë të plotë vërtetësinë e tablosë së ngjarjes.
Konflikti ka ndodhur pranë vendit të punës së bashkëshortit tim, jo në zyrat e shtetit dhe pasi është hetuar nga organet e drejtësisë në bazë të kallëzimit të bërë nga pala tjetër është pushuar për mungesë provash. I vetmi ndikim i imi në këtë proces ka qenë se nuk e kam lejuar bashkëshortin të bëjë kallëzim, pikërisht sepse personi në fjalë ka qenë drejtues i një institucioni varësie kur kam marrë detyrën si Ministre e Financave dhe s’kam dashur në asnjë mënyre që familja ime të marrë iniciativën”, shkruan Ibrahimaj.
Ministrja shton se me Koshajn ka pasur një marrëdhënie normale, duke qenë se institucioni që ky i fundit drejtone ishte i varur nga vetë Ministria e Financave dhe Ekonomisë.
Duke mos dashur të komentoj më tej për shkak se nuk janë në tagrin e saj, Ibrahimaj deklaron se këto akuza u rikthyen për lajm pas 5 muajsh, për shkak të funksionit të saj publik.
“Një element tjetër lehtësisht i provueshëm është se pavarësisht dinamikës së ngjarjes dhe faktit që bashkëshorti im ka qenë padrejtësisht i kallëzuar për diçka që nuk e ka bërë, ashtu si konfirmohet nga vendimi i organeve të akuzës, pala kallëzuese ka vijuar të qëndrojë në vendin e punës edhe pas largimit tim nga funksioni i Ministres së Financave dhe Ekonomisë 7 muaj më parë.
Nuk besoj se është e nevojshme në këtë pikë, por po sqaroj sidoqoftë se nuk kam pasur asnjë konflikt me kallëzuesin gjatë gjithë kohës së qëndrimit tim në atë detyrë, siç nuk kam pasur asnjë konflikt me asnjë person në varësine time.
Ky fakt besoj e thotë vetë të vërtetën që konflikti në fjalë, nuk ka pasur asnjë lidhje me mua apo detyrën time. Padyshim do të kishte qenë me e mira që të mos kishte ndodhur, por nganjëhere zhvillimet e padëshiruara në marrëdheniet me të tjerët na zgjedhin, nuk i zgjedhim. Por e përsëris që kjo ngjarje nuk ka asnjë lidhje me institucionet shtetërore, me funksionet e institucionit që kam drejtuar dhe me mua personalisht. Ndërkohe e mirëkuptoj me keqardhje faktin se pikerisht për shkak të detyres dhe angazhimit tim publik, nje ngjarje e 5 muajve të shkuar bën sot lajm për arsye qe nuk janë në tagrin tim institucional t’i komentoj. Ndjesë kujtdo që mund të jetë shqetësuar nga ky lajm, por kushdo të jetë i bindur se s’ka asnjë të vërtetë tjetër nga sa rendita më lart”, shkruan Ibrahimaj./vizionplus.tv
