Flakët kanë përfshirë një zonë të Dimalës, ku si pasojë janë djegur 400 rrënjë ullinj. Mësohet se flakët në fshatin Bistrovicë janë ‘luftuar’ nga zjarrfikësit me mjete rrethanorë, për shkak të mungesës së rrugës që të çon në zonë.
Si pasojë e temperaturave të larta dhe erës, zjarri është favorizuar dhe është përhapur me shpejtësi drejt pemtarive, duke djegur rreth 400 rrënjë ullinj. Edhe pse shërbimet zjarrëfikëse kanë mbërritur në kohë, mungesa e rrugës e ka bërë të pamundur hyrjen e tyre në afërsi të territorit të zjarrit.
Për shkak të terrenit të vështirë dhe mungesës së sasisë së mjaftueshme të ujit, disa vatra zjarri vijojnë ende të jenë aktive. Banorët shprehen se nuk ka asnjë rrugë drejt zonës kodrinore me pemtari dhe kjo ka bërë që mjetet e mëdha zjarrëfikëse të ngelen disa kilometra larg zjarrit.
