Policia e Tiranës ofron 5000 euro shpërblim për këdo që ka informacione për autorin, i cili grabiti sot dyqanin e celularëve “3V Fejzo” në Myslum Shyr.
Autori, me maskë të zezë dhe me një xhup të kuq, nën kërcënimin e një sendi të dyshuar si armë zjarri pistoletë, ka marrë disa aparate celular në dyqanin e shtetasit M. F., dhe më pas është larguar, njofton policia.
“DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e tij”, thuhet më tej në njoftim.
Ngjarja ndodhi paraditen e sotme dhe siç mësoi Vizion Plus, autori ka arritur që të marrë 15 celularë nga dyqani. Ai më pas është larguar në këmbë. Në vendin e ngjarjes janë nisur edhe Forcat Shqiponja.
Grupi hetimor ndodhet në vendngjarje dhe po punon për zbardhjen e dokumentimin e autorësisë të kësaj ngjarje./vizionplus.tv