Prokuroria e Posaçme kundër Krimit të Organizuar dhe Korrupsionit do të kërkojë nga autoritetet italiane të gjitha materialet që kanë lidhje me Shqipërinë, e që janë pjesë e përgjimeve për grupin e akuzuar për lidhje me organizatën mafioze ‘Ndrangheta’.
Burime pranë SPAK bëjnë me dije se të hënën do të kontaktojnë me autoritetet italiane e pas marrjes së informacionit prokurorët do të vendosin për veprimet e mëtejshme.
Por, opozita i ka kërkuar Spak-ut të nisë menjëherë hetimet duke hequr paralele me rastin e ish-ministrit të brendshëm Saimir Tahiri.
“Prokuroria e Posaçme Antikorrupsion nuk duhet të heshtë! Më e pakta që mund të bëjë SPAK është të ruajë standardin e ndjekur me Saimir Tahirin! Heshtja e SPAK është kundër interesit të Shqipërisë dhe qytetarëve që presin me padurim veprimin e drejtësisë njësoj për të gjithë”, tha Belind Këlliçi, kryetar i FRPD.
I gjithë debati në Tiranë lindi pas operacionit të finalizuar pak ditë më parë në Itali nën emrin e koduar “Basso Profilo”, si rezultat i të cilit u morën të pandehur 50 persona, të gjithë të akuzuar për lidhje me mafian kalabreze, Ndrangheta.
Në vendimin e Gjykatës së Catanzaros, përmenden dhe shumë emra politikanësh dhe zyrtarësh të lartë shqiptarë, por mbetet e paqartë nëse ata kanë lidhje direkt apo janë përmendur vetëm për të rritur besueshmërinë e për të treguar rrjetin e njohjeve të tyre.
Një prej emrave të përmendur është dhe ai i Presidentit të Republikës, Ilir Meta si dhe këshilltarit të tij, Ilir Kulla. Nga ana tjetër, përgjimet e Prokurorisë, të pranuara edhe nga Gjykata, nënvizojnë interesat shumë milionshe në ndërtimin e kullave në Tiranë si dhe paratë që duheshin paguar si ryshfet, dhe këtu përmendet dhe një personi me emrin ‘Niku’ që shërbente si sekser për lejet dhe tenderat.
