Policia po vijon kontrollet për lokalizimin dhe arrestimin e Klered Bozhanaj, autor i dyshuar i plagosjes se efektivit të forcave Shqiponja, Edlir Alleshi, ngjarje e ndodhur mbrëmjen e së mërkurës në Tirane.
Agjentët kanë ushtruar kontrolle në disa banesa, shtëpi të braktisura, magazina dhe zona të tjera, por deri më tani nuk ka asnjë gjurmë të 42-vjeçarit.
Hetuesit kanë kontaktuar edhe familjarët e autorit të dyshuar të cilët janë treguar bashkëpunues, por dëshmia e tyre nuk ka ndihmuar në kërkime.
Më herët Policia e Tiranës vendosi shpërblim 20 mijë euro për çdo informacion që do të çojë në kapjen e autorit të plagosjes, ndërsa dyshohet se Bozhanaj ka ende me vete armën e zjarrit duke rritur rrezikun për krime të tjera.
Edlir Alleshi, i cili në atë momentin e plagosjes ishte në krye të detyrës ka ndjekur autorin e dyshuar deri në hyrjen e pallatit të tij në afërsi të zonës së njohur si Porcelani.
Pasi i janë afruar Bozhanaj ka nxjerrë armën dhe ka plagosur në bark me dy plumba efektivin.
42-vjeçari dyshohet se ka probleme me depresionin ndërkohë qe prej pak kohësh ai ishte kthyer nga Italia.
Efektivi i plagosur është dërguar menjëherë te Spitali i Traumës ku i është nënshtruar ndërhyrjes kirurgjikale dhe ndodhet jashtë rrezikun për jetën.
