Detaje të reja kanë dalë nga ngjarja e rëndë ku ndërroi jetë në spital pas shoqërimit nga policia, 32-vjeçari Laer Kurti.
Burime për Vizion Plus bëjnë me dije se viktima Laer Kurti, ishte përdorues i lëndëve narkotike dhe me sëmundje të epilepsisë. Në momentin kur është shoqëruar në ambjentet e Komisariatit nr 3, Kurti ka filluar të shfaqë probleme shëndetësore.
Menjëherë është lajmëruar ambulanca, por për shkak se është vonuar, efektivët e kanë dërguar me makinën e policisë me urgjencë në spital ku dhe ndërroi jetë. Bashkë me viktimën është shoqëruar dhe shoku i tij, i identifikuar si Zyhdi Spahiu.
Ky i fundit eshte kapur i dehur në mjetin e tij. Spahiu është lënë i lirë, por është shoqëruar me gjobë për shkak të dozës së alkoolit. Dyshohet se viktima dhe shoku i tij fillimisht kanë qenë bashkë, por më pas janë ndarë kur është afruar policia.
Laer Kurti rezulton me 3 precedentë penalë për vjedhje dhe drogë.
Ai njihet si shok i grupit të Pajtim Serjanit.
