Monumenteve unikalë të qytetit të Durrësit i shtohet tashmë edhe një mozaik i rrallë.
Duke hapur themelet për rindërtimin e shkollës së mesme “Gjergj Kastrioti” rastësisht doli në dritë një pjesë mozaiku e panjohur më parë .
Sipas arkeologut Luan Përzhita i cili drejton punën për këtë zbulim arkeologjik ky është një mozaik mjaft i rrallë jo vetëm për vendin tonë por për të gjithë rajonin e Ballkanit.
Mozaiku i përbërë nga gurë ngjyrë blu të errët dhe të bardhë ku paraqiten figura gjeometrike dhe floreale i përket fundit të shekullit të I dhe fillimit të shekullit të II dhe është pjesë e një vile luksoze që ndodhej pranë amfiteatrit të Durrësit.
Deri tani janë zbuluar disa pjesë të këtij mozaiku që mendohet të ketë një sipërfaqe rreth 60 metër katror. Përveç mozaikut është zbuluar edhe një pjesë muri 3 metër e lartë në anën lindore si dhe disa objekte të tjera.
Ky është një zbulim mjaft i rrallë që i shtohet trashëgimisë së jashtëzakonshme arkeologjike të qytetetit të Durrësit.
