Erion Veliaj ka pritur boksierin shqiptar, Kristian Prenga, i cili u shpall kampion bote, duke fituar titullin NAB-North American Belt. Veliaj i dha sportistit medaljen e “Mirënjohjes së qytetit” dhe u shpreh se ky sukses shërben si frymëzim për brezat e rinj.
“Je frymëzim për djemtë e vajzat në të gjithë Shqipërinë, por edhe jashtë Shqipërisë. Shpresoj shumë që të vazhdosh të mbetesh fillimisht një çun i mirë, më pas edhe një sportist i mirë.”
Kryebashkiaku tha se tashmë që Tirana këtë vit është edhe qyteti europian i sportit, pret që këtë titull boksieri ta sjellë edhe në kryeqytet.
“Mezi pres, këtë vit që Tirana është Qyteti Europian i Sportit, ndoshta e gjejmë një mundësi edhe kur afrojnë festat e nëntorit, të kemi një ndeshje tënden në Tiranë. Unë e di që ti je i zënë dhe sot je në kërkim nga të gjithë promotorët, por për ne do ishte një privilegj i madh që të të kishim, jo vetëm si një luftëtar që sjell Kupën e Botës dhe më të mirën e sportit, por edhe si dikush që frymëzon një brez të ri që të ecë me punë, me përpjekje, e me talent e djersë arrin të ecë përpara,”
Boksieri Kristian Prenga ka planifikuar ndeshje në vjeshtë në Shqipëri, por ende nuk ka një datë të saktë.
