Operacionet e spiunazhit kibernetik gjatë pandemisë patën pasoja të rënda ekonomike, veçanërisht për vendet e zhvilluara.
”Për shembull, pretendohet se kostoja e spiunazhit kibernetik për SHBA-në është rreth 100 miliardë dollarë në vit”, thotë profesori Ali Burak Daricili.
Pas komercializimit të internetit, kjo mundësi e re teknologjike ka fituar një rëndësi të madhe në çdo aspekt të jetës së përditshme.
Në këtë kontekst, aktivitetet e shërbimeve sekrete janë bërë shumë më të sofistikuara për shkak të zhvillimeve teknologjike.
Sidomos që nga vitet 1990, me komercializimin e shpejtë të internetit, teknologjitë e internetit kanë filluar të luajnë një funksion shumë të rëndësishëm në aktivitetet e përditshme si të shtetit, ashtu edhe të njerëzve të zakonshëm.
Rrethana të tilla kanë çuar që edhe shtetet të zhvillojnë plane për shfrytëzimin e teknologjive të internetit në spiunazhin tradicional.
Pas zhvillimit dhe përdorimit të gjerë të telefonave inteligjentë pas vitit 2010, procesi i digjitalizimit me rritjen e efikasitetit të aplikacioneve të përdorura në telefonat e gjeneratës së re filloi të ndikojë dhe të formësojë çdo aspekt të jetës, nga publiku në jetën e përditshme të njerëzve të zakonshëm, nga ato komerciale deri tek të gjitha llojet e aktiviteteve shoqërore.
Me shpërthimin e pandemisë së koronavirusit (COVID-19), e cila mbylli jetën tonë për një periudhë rreth dyvjeçare, ky proces i digjitalizimit ka hyrë në një dimension të ri.
Shumë kompani në gjithë botën kanë filluar të inkurajojnë punonjësit e tyre që të punojnë nga shtëpia. Aktivitetet e edukimit dhe trajnimit dhe të gjitha llojet e punës akademike tani kryhen në distancë duke përdorur programe video-konferencash.