Rreth 75% e italianëve janë pro përdorimit të certifikatës shëndetësore për të luftuar epideminë Covid-19, sipas një sondazhi të publikuar sot nga gazeta “La Stampa”.
Deri më tani, kjo certifikatë shëndetësore ishte e detyrueshme vetëm për personelin shëndetësor.
Nga 1 shtatori, përdorimi i tij i detyrueshëm u shtri për stafin mësimor, si dhe për udhëtarët në trena, anije, aeroplanë dhe autobusë në distanca të gjata.
Lidhur me vendosjen e kësaj certifikate shëndetësore për arsimtarët, 76.1% e italianëve të anketuar janë pro, kundrejt 21.4% që janë kundër, ndërsa 75.4% thonë se mbështesin përdorimin e tij në mjetet e përmendura të transportit, krahasuar me 21.9% që janë kundër.
Sondazhi u krye më 2 shtator në një grup prej 1.000 personash nga Instituti Kërkimor “Euromedia”.
Kryeministri Mario Draghi njoftoi javën e kaluar synimin e tij për të shtrirë përdorimin e certifikatës shëndetësore në sektorë të tjerë.
Nga fillimi i gushtit, kjo certifikatë shëndetësore, e cila përmban një certifikatë vaksinimi, dëshmi të shërimit nga Covid-19 ose një test negativ, është e detyrueshme për të hyrë në restorante ose në muze, kinema apo salla sportive.
Aktualisht në Itali, mbi 71% e popullsisë mbi moshën 12 vjeç është plotësisht e vaksinuar.
