Aleanca për Shqiptarët akuzon se dëftesat në ditarin elektronik plotësohen vetëm në gjuhën maqedonase e jo edhe në shqip.
Shtojnë se kjo është diskriminuese dhe degraduese për arsimtarët shqiptarë, të cilët pastaj detyrohen që të kërkojnë para nga nxënësit ose të paguajnë vetëm për plotësim dëftesash.
“Deri sa ishte ministre znj.Carovska kjo edhe mund të kuptohej, por kur ministri dhe zv/ministri janë shqiptarë, kjo s’do asnjë koment më tepër. Nëse ankoheni se nuk keni ekspertë nga lëmi i IT ose përkthyes, si gjithmonë do të ju ndihmojmë më ekspertët tanë, por pranoni se nuk jeni të aftë të menaxhoni dhe ta implementoni gjuhën shqipe si gjuhë zyrtare”, tha Naim Bajrami, zëdhënës i ASh-së.
Akuzat i hedh poshtë Ministria e Arsimit dhe Shkencës.
Në televizionin 21, ata kanë dërguar fotografi të cilat sipas tyre dëshmojnë se ekziston edhe opsioni në gjuhën shqipe.
“Për herë të parë pas shumë vitesh, ditari elektronik punon pa vonesa. Dje janë regjistruar 731.000 nota në ditar, që është rekord. Po ashtu, dëftesa gjenerohet në mënyrë automatike, në gjuhën e zgjedhur, pra edhe në gjuhën shqipe. Nga shtatori, do të vijojnë risi të tjera ku si rezultat, të dhënat nëpër shkolla do të ruhen vetëm në forme elektronike, do të ketë edhe shumë shërbime tjera shkollore të cilat do të jenë elektronike, transparente dhe të shpejta”, thonë nga Ministria e Arsimit dhe Shkencës.
Për ndihmën e ofruar nga Aleanca për Shqiptarët për t’ju dërguar ekspertë të IT-së ministrisë së Arsimit, nga ky dikaster u përgjigjën se nuk kanë nevojë.
Theksuan se përgjigjja për akuzat e ASh-së është dërguar pikërisht nga këshilltari i posaçëm i ministrit për politika arsimore, Dr.Shpetim Latifi, inxhinier i IT-së.
MASH demanton deklaratën e Aleancës për Shqiptarët për dëftesat vetëm në gjuhën maqedone shkruan Telegrafi.