Ne kemi një ekip profesionistësh që do të bëjnë çmos për të mbrojtur zërin dhe vullnetin e popullit, tha kryetari i OBRM-PDUKM-së Hristijan Mickoski në promovimin e kandidatëve për ministra dhe zëvendësministra në qeverinë teknike. Mickoski tha se në periudhën e ardhshme, partia do të përqendrohet në konsolidimin e zërit anti-qeveritar, dhe ministrat e tyre do të tregojnë se nuk janë të gjithë njësoj.
“Unë pres nga këta pesë persona, dhe nga qytetarët e Maqedonisë të cilët nuk janë të kënaqur me politikat e kësaj qeverie, pres që ata të mos jenë viktima të retorikës së skifterëve, të cilët janë opozitë e opozitës, të konsolidojnë zërin rreth koalicionit të udhëhequr nga OBRM-PDUKM dhe të fitojnë 61 deputetë, duke hapur kështu derën jo për reforma, por për transformimin e Maqedonisë”, deklaroi Hristijan Mickoski – Kryetar i OBRM-PDUKM-së.
Duke folur për kandidatin për Ministër të Brendshëm, Pançe Toshkovski, Mickoski theksoi se koha e skenarëve të Hollivudit dhe spektakleve të hyrjes në shtëpi do të përfundojë, gjë që, shtoi ai, anëtarët e kësaj partie e përjetuan.
“Ministria e Brendshme do të bëjë çmos në periudhën e ardhshme për të siguruar një luftë të vërtetë kundër krimit të organizuar, dhe veçanërisht korrupsionit të lartë në Republikën e Maqedonisë”, tha Pançe Toshkovski – kandidat për Ministër të Brendshëm.
Kandidati për ministër i punës dhe politikës sociale, Gjoko Velkovski, iu referua paketave të fundit të ndihmës për kategoritë e qytetarëve, dhe tha se në të ardhmen OBRM-PDUKM do të krijojë zgjidhje sistematike.
“Këta njerëz duhet të çlirohen nga çdo presion nga përfaqësuesit e qeverisë aktuale”, u shpreh Gjoko Velkovski – kandidat për ministër të Punës dhe Politikës Sociale.
Zëvendësministri shtesë i Administratës, Stefan Andonovski, i bëri thirrje qeverisë të tërheqë menjëherë të gjitha shpalljet e sapo shpallura për tre mijë pozicione, sepse në të kundërt do të ketë përgjegjësi.
“Njerëzit që nuk ranë nën sundimin e BDI-së janë të munduar, i kanë ngecur. Disa prej tyre u zhvendosën në vende të punës 20-30 kilometra nga vendbanimi i tyre, në mënyrë që në të njëjtën kohë vendet e tyre të mbusheshin artificialisht me njerëz të papërshtatshëm, që ndryshojnë etninë e tyre tri herë në ditë për të aplikuar për konkurse”, nënvizoi Stefan Andonovski – kandidat për zëvendësministër shtesë të administratës.
OBRM-PDUKM gjithashtu do të marrë pjesë në qeverinë teknike me një zëvendësministre shtesë të Financave, Elena Petrova, si dhe me një zëvendësministër shtesë të Bujqësisë, Cvetan Tripunovski. /Alsat.mk
Mickoski: Kandidatët e OBRM-PDUKM-së janë profesionistë shkruan Telegrafi.