Një tjetër dokument me të dhëna sekrete është publikuar nga një faqe që pretendohet se administrohet nga hakerat e huaj.
Këtë rradhë bëhet fjalë për listën me të gjithë personat e shpallur në kërkim nga Drejtoria e Policisë së Durrësit.
Nga ana tjetër, pasi të gjitha të dhënat dhe jo vetëm kjo listë me emra, janë shpërndarë nga të gjitha televizionet, portalet, radiot dhe rrjetet sociale, Prokuroria e Tiranës është kujtuar që të vendosë ndalimin e publikimit.
Kjo është praktikisht e pamundur, jo vetëm sepse cënon lirinë e medias e të informimit, por edhe sepse çdo qytetar tashmë posedon të dhënat sekrete që janë hakëruar.
Do të ishte më e udhës që prokuroria të merrej me hakëruesit sesa me publikuesit.
Reagimi i plotë:
Policia e Shtetit
Në zbatim të vendimit të prokurorit të Prokurorisë së Rrethit Gjyqësor Tiranë, të datës 19.09.2022, për sekuestrimin e të dhënave, në kuadër të procedimit penal Nr.5430 të vitit 2022, për veprat penale “Ndërhyrja në të dhënat kompjuterike”, “Ndërhyrja në sistemet kompjuterike”, dhe “Keqpërdorimi i pajisjeve” bëjmë me dije mediat dhe opinionin publik se:
AdvertisementMe vendimin e datës 19.09.2022, Prokuroria ka vendosur ndalimin e publikimit të çdo të dhëne të botuar nga autorët e sulmit kibernetik, vendim ky në zbatim të nenit 103 të Kodit të Procedurës Penale “Ndalimi i publikimit të aktit”.
Prokuroria ka vendosur që asnjë e dhënë e botuar nga autorët e sulmit kibernetik të mos publikohet nga mediat audiovizive, të shkruara, online, në rrjete sociale apo në çdo formë të publikimit apo transferimit të të dhënave që postohen nga autorët e këtij sulmi kibernetik mbi sistemin TIMS të Policisë së Shtetit.
AdvertisementProkuroria ka ngarkuar Njësinë C për Hetimin e Krimit Kibernetik në Policinë e Shtetit, Autoritetin e Mediave Audiovizive (AMA) dhe Autoritetin e Komunikimeve Elektronike dhe Postare (AKEP), që të grumbullojnë të gjithë informacionin e deritanishëm dhe të ardhshëm të të dhënave objekt sekuestrimi.
Në rast të shkeljes së këtij vendimi nga cilido, Njësia C për Hetimin e Krimit Kibernetik në Policinë e Shtetit do të nisë menjëherë hetimin në kuadër të procedimit penal Nr.5430/2022, për vendosjen përpara përgjegjësisë ligjore të personave përgjegjës.
AdvertisementPolicia e Shtetit kërkon mirëkuptimin e mediave dhe të opinionit publik, pasi publikimi i këtyre të dhënave cënon rëndë rendin publik dhe sigurinë kombëtare.
