Partia socialiste duket se ka triumfuar edhe në bastionet që janë cilësuar prej vitesh të Partisë Demokratike si Shkodra,Tropoja Devolli dhe Kamza.
Pas më shumë se 30 vitesh Edi Rama duket se është shumë pranë fitores në Bashknë e Shkodrës. Kandidati socialist Benet Beci ka krijuar një avantazh të dukshëm ndaj rivalit të tij të koalicionit “Bashkë fitojmë”, Bardh Spahia. Deri më tani Beci ka marrë plotë 32282 vota kundër Spahias i cili ka marrë 21259 vota .
Po ashtu edhe në vendlindjen e kryedemokratit Sali Berisha në bashkinë Tropojë triumfoi Partia Socialiste. Kandidat i PS Rexhe Byberi kryesoi me 5126 vota përballë kandidatit të koalicionit “Bashkë Fitojmë” Besnik Dushaj i cili mori 4876 vota.
Ndonëse në zgjedhjet e vitit 2019 nuk kishte një kandidat përballë, Byberi këtë herë ka mundur të marrë besimin e tropojanëve me një diferencë prej 250 votash.
Ndërkohë edhe Bashkia e Devollit i është besuar për 4 vitet e ardhshme kandidatit të Partisë Socialiste Eduart Duro me 8376 vota, ndërkohë kandidati i koalicionit “Bashkë Fitojmë” Elvis Hajdërlli ka fituar 8011 vota.
Në një deklaratë për mediat Duro e cilësoi një fitore për të gjithë Devollin
Ndërsa drejtuesi politik i qarkut, Niko Peleshi e cilësoi fitoren si hapjen e një faqeje të re të historisë moderne në këtë bashki.
NIKO PELESHI
DREJTUES POLITIK I PS, QARKU KORCE
Advertisement
Devolli ishte një fitore e shkëlqyer sepse besuam dhe fituam. Ishte fitorja e njerëzve të punës, Devolli sapo ka hapur faqen e re te historise moderne.Edhe pse ishte e veshtire kisha besimin se do e merrnim Devollin.Tradicionalisht ka qënë e partisë demokratike,por tani do të jetë ndryshe.
Surprizues ishte edhe rezultati i bashkisë Kamëz, ku kandidati i PS Rakip Suli do të drejtoj për një tjetër mandat këtë bashki. Ai fitoi me 27.856 vota kunder rivalit të tij politik të koalicioni “Bashkë fitojmë”, Arjan Hoxha i cili arriti të marr 16.306 vota.