Kolegji Zgjedhor nis sot rinumërimin e 18 kutive të votimit në Kuçovë nga zgjedhjet e 14 majit. Bëhet fjalë për 18 kuti të votave për kryetar të bashkisë Kuçovë.
Rinumërimi është në vijim të procesit ankimor nga një padi e dorëzuar nga kandidati i koalicionit “Bashkë Fitojmë” për kryetar të Bashkisë së Kuçovës Lefter Maliqi.
Maliqi ka ngritur pretendime dhe akuza që procesi zgjedhor më 14 maj në Bashkinë e Kuçovës ka qenë i manipuluar.
Burime për Vizion Plus bëjnë me dije se rinumërimi i votave në Kolegj është shoqëruar me debate të ashpra.
Ka qenë Maliqi ai i cili ka “shpërthyer” në sharje ndaj sekretarit të përgjithshëm të KQZ Ylli Merkja, duke e quajtur këtë të fundit si hajdut.
“Mua më thua kështu ti? Hajdut. Ti je hajdut. Kush e thirri atë? Hajdut. Kur të dojë gjykata le ta thërrasë gjykata. Kujt i mëson? Mua më mëson ti që kam qenë oficer policie 25 vjeç, anëtar i Komisionit të Sigurisë 7 vjet?Për çfarë jam këtu? Për të mbrojtur demokracinë, nuk jam për të vjedhur”, dëgjohet të thotë Maliqi.
Kujtojmë se Lefter Maliqi i ishte drejtuar me herët Komisionit të Ankesave dhe Sanksioneve, ku kërkonte hedhjen poshtë të vendimit të KZAZ së Kuçovës, e cila shpalli fitues kandidatin socialist Kreshnik Hajdari në zgjedhjet e 14 Majit, duke e akuzuar kundërshtarin për blerje votash.
