Europa Lindore po përballet me eksodin më të madh të refugjatëve ukrainas që pas pushtimit rus në 24 Shkurt. Më shumë se 3.5 milionë njerëz kanë ikur jashtë vendit nga lufta në Ukrainë, treguan të martën të dhënat e Kombeve të Bashkuara.
Sipas ekspertëve tanimë këto vende duhet t’u sigurojnë atyre kujdes shëndetësor, arsimor dhe punë edhe pse numrat e atyre që largohen nga lufta mund të rriten me ritme të frikshme.
Miliona që janë larguar nga Ukraina që nga fillimi i pushtimit rus, kanë bërë rrugën në këmbë, me tren, autobus ose makinë për në vendet fqinje si Polonia dhe Rumania përpara se të udhëtojnë nëpër Europë. Ndërsa më pak prej tyre e kanë kaluar kufirin gjatë javës së shkuar.
“Reuters” raporton se ata kërkojnë siguri në Bashkimin Europian si edhe shtëpi ku të strehohen. Polonia, shtëpia e diasporës më të madhe ukrainase në rajon edhe para luftës, ka marrë më shumë se 2.1 milionë njerëz dhe disa planifikojnë të shkojnë diku tjetër.
“Numri i fëmijëve të refugjatëve nga Ukraina në shkollat polake po rritet me rreth 10,000 në ditë”, tha ministri i Arsimit Przemyslaw Czarnek për radion publike, duke thënë se 85,000 fëmijë ishin regjistruar në shkollat polake.
Czarnek tha se autoritetet po organizonin kurse në gjuhën bazë polake për mësuesit ukrainas, në mënyrë që ata të mund të punësoheshin në shkollat lokale dhe të mësonin klasa përgatitore për fëmijët ukrainas përpara se të hynin në sistemin shkollor. Ndërsa kalimet kufitare si Medyka në Poloninë lindore dhe Isaçea në Rumaninë verilindore janë bërë më pak të ngarkuara, zyrtarët janë të kujdesshëm se çdo intensifikim i luftimeve në Ukrainë mund të shkaktojë një fluks të ri.
